சென்னை: அஜீத் குமார் நடித்த வரலாறு படத்தில் இளைய தளபதி விஜய் நடித்திருந்தால் எப்படி இருக்கும் என்று ஒரு கற்பனை.

கே.எஸ். ரவிக்குமார் இயக்கத்தில் அஜீத் குமார் மூன்று வேடங்களில் நடித்த படம் வரலாறு. 2006ம் ஆண்டு வெளியான இந்த படத்தில் அஜீத் அசின், கன்னிகா உள்ளிட்டோர் நடித்திருந்தனர். அப்பா அஜீத் பரதநாட்டியக் கலைஞராக வந்து கலக்கி இருப்பார். அவரிடம் ஒரு மகனும்(அஜீத்), அம்மா கனிகாவிடம் ஒரு மகனும் (அதுவும் அஜீத்தே) வளர்வார்கள். அதில் பெண் போன்று நளினத்துடன் நடக்கும் தன்னைப் போன்று தன் மகனும் வந்துவிடக்கூடாது என்று அப்பா அஜீத் வீல் சேரிலேயே இருப்பார்.

இந்த படத்தில் டான்ஸில் கலக்கும் விஜய் நடித்திருந்தால் எப்படி இருக்கும் என்று ஒரு கற்பனை. விஜயுடன் ஒப்பிடுகையில் அஜீத் டான்ஸ் சுமார் தான். ஆனாலும் டான்ஸ் பின்னணி இல்லாத அஜீத் வரலாறு படத்தில் பரத நாட்டியக் கலைஞராக அற்புதமாக நடித்திருந்தார். இது அஜீத் நடித்தற்காக சொல்லவில்லை. அதே கதாபாத்திரத்தில் விஜய் நடித்திருந்தால் அஜீத் அளவுக்கு நன்றாக வந்திருக்குமா என்று தெரியவில்லை.

மேலும் விஜய்க்கு பரத நாட்டிய உடை அணிந்து முக பாவனைகள் செய்வது, நடையில் நளினம் காட்டுவது போன்றவை அவருக்கு வந்திருக்கும் என்றாலும் அது அஜீத் அளவுக்கு நிச்சயமாக இருந்திருக்காது.

இன்னொரு விஷயம் என்னவென்றால் விஜய்க்கு அவ்வளவாக அழ வராது. அவர் கண் அருகே கைகளை கொண்டு சென்றால் அவர் அழுகிறார் என்று அர்த்தம் செய்து கொள்ள வேண்டும். அதனால் அழுகிற காட்சிகளில் விஜய் அழுதால் இன்னும் கொஞ்ச ப்ளீஸ் இந்த தடவையாவது கொஞ்சம் அழுங்க என்று சொல்லத் தோன்றும்.

அசினை காதலிக்கும் அஜீத் கதாபாத்திரம் விஜய்க்கு பொருந்தியிருக்கும். கனிகாவுடன் இருக்கும் மகன் அஜீத் மற்றும் பரத நாட்டியக் கலைஞர் அஜீத் கதாபாத்திரங்கள் விஜய்க்கு அவ்வளவாக பொருந்தியிருக்காது.